М. Жұмабаев атындағы Ақмола облыстық әмбебап ғылыми кітапханасының «Көпшілік іс-шаралар және қоғаммен байланыс бөлімі» 14 мамыр күні жазушы, драматург, жерлес ағамыз Ш. Хұсайыновтың 115 жылдығына орай «Драматургия тарланы» атты портреттік кеш өткізді.
Шара кітапханамыздың «Өнер саласындағы әдебиеттер бөлімінің» маманы Г.Д. Баймағамбетова дайындаған кітап көрмесін көрерменге таныстырудан басталды. Ш. Хұсайыновтың өмірі мен шығармашылығы туралы арнайы дайындалған көрмеге Г.Д. Баймағамбетова сауатты, мазмұнды, қызықты шолу жүргізді.
Ш. Хұсайыновтың туған жері СҚО, Айыртау ауданы, Қаратал ауылының орта мектебіндегі «Өлкетану мұражайының» Ш. Хұсайыновқа арналған бөлімімен осы мектептің директорының оқу ісі жөніндегі орынбасары Ә.Б. Тажина Zoom платформасында таныстырды. Мұражайда сақталған жазушының кей жәдігерлерін бейнежазба арқылы көрермен назарына ұсынды.
Кітапханамыздың «Ақпараттық-библиографиялық бөлімінің» Ш. Хұсайынов туралы кітапхана қорындағы барлық мағлұматтарды, әдеби деректерді, мерзімді басылым беттеріндегі жарияланымдарды, зерттеу еңбектерін, кітаптарды, фотосуреттерді жинақтап, әзірлеген «Замана заңғары» атты диск LED экран арқылы таныстырылды.
Одан соң Ш. Уәлиханов атындағы Көкшетау университетінде «Қазақ тілі мен әдебиеті» мамандығының шәкірттеріне талай жылдар дәріс оқып, білімнің тұңғиығына жетелеген білікті ұстаз, бүгіндері зейнетке шыққан А.Ы. Есмағұлов ағамыз қаламгердің қазақ әдебиетіне қалдырған асыл мұрасы жайында салмақты да тартымды ой-пікірлерін ортаға салды.
Әрі қарай Ш. Хұсайынов атындағы Ақмола облыстық қазақ музыкалық-драма театрының осы шараға қатысқан әртістерінің атынан актриса Маржан Бөкешова кітапхана ұжымына алғысын білдірді.