2021 жылдың 4-інші қазаны күні Мағжан Жұмабаев атындағы Ақмола облыстық әмбебап ғылыми кітапханасында Шоқан Уәлиханов атындағы Көкшетау университетінің жанындағы «Жас Отан» жастар қанаты 17.00-ден 20.00-ге дейін «Кітапхана кешін»ұйымдастырды.
Іс-шараның мақсаты: Кітапхананы әлеуметтік-мәдени орталық ретінде танымал ету және жаңа оқырмандарды, әсіресе жастарды кітапханаға тарту.
Осы қысқа уақыт ішінде кітапхананың оқырмандарға арналған оқу залдары шығармашылық алаңына айналды. Жүректері жырға толы жалынды жастар өлең оқып, ән де айтты, өнерлерін көрсетіп түрлі ойындар ойнады. Түрлі мазмұндағы алаңдар өздерінің тұрақты оқырмандарын және қонақтарын қуана қарсы алды: коворкинг орталығында қазақтың ұлттық аспабы – Домбыраға арналған поэзия кеші өтті.
Өнерге байланысты әдебиеттерге арналған залдың төрінде үстел ойындары орын алып, онда шахмат пен тоғызұмалақ ойналды.
«Рухани жаңғыру» залында жастардың бойында көшбасшылық қасиеттерді тәрбиелеу бойынша тренинг өткізіліп, мерзімді басылымдар залында студенттер арасында дебат ұйымдастырылды. «Жауқазын» театр студиясының жастары өз өнерлерін көрсетті.
Көңілді кеште келген жас өзін қызықтырған өнерді көңіл қалауымен таңдап қатысуына мүмкіндік алды. Кітапхана үшін үйреншікті болмаса да, маңайын әнге бөлеген думанды жастардың әсем күлкісімен жағымды атмосфера кітапхана ішін жайлап алды. Әп-сәтте жанды және шығармашылық алаңына айналған кітапханамыз ұзақ уақыттан бергі оқырманын сағынған, сағындырған сәттерімен қайта қауышқандай күй кешті.
