2021 жылдың 18 мамырында Мағжан Жұмабаев атындағы АОӘҒК-ның ақпараттық-библиографиялық бөлімінің ұйымдастыруымен ZOOM платформасында “Алтын Арқа” ақпараттық-ағартушылық орталығының 23-ші отырысы өтті. Кездесуге Қазақстанның еңбек сіңірген қайраткері, ақын, жазушы, драматург, жыршы, манасшы, импровизатор, сыншы, сатирик, кинорежиссер және әртіс, балалар ақыны және жазушысы Баянғали Әлімжанов, Л. Толстой атындағы Қостанай облыстық кітапханасының қызметкері, жас ақын, филолог, әдебиеттанушы, «Ақ қауырсын» әдеби жастар клубының жетекшісі, педагогика ғылымдарының магистрі, көптеген әдеби байқаулардың жеңімпазы, көсемсөзші Айтжан Құрымғалиұлы және автор шығармашылығына қызығушылық танытқан бір топ оқырмандар, кітапхана қызметкерлері қатысты. Іс-шараны “Алтын Арқа” ақпараттық-ағартушылық орталығының төрағасы, ақын, жазушы, журналист, Қазақстан Жазушылар одағының мүшесі, «Көкшетау» газетінің бас редакторы Серік Жетпісқалиев жүргізді. Шара барысында «Өңір мен өмір» жобасы аясында дайындалған “Өмірдің өзі” электронды басылымының тұсаукесері өтті. Баянғали Әлімжанов өз шығармашылығымен бөлісіп, жаңадан шыққан кітаптарын кітапхана қорына сыйлаймын деді. Қостанайлық оқырмандар ақынның өлеңдерін оқыды. Кітапхана оқырмандары үшін автор шығармашылығын дәріптейтін кітап көрмесі дайындалды.
