2019 jyldyń 17 qazany M.Jumabaev atyndaǵy AOÁǴK-nyń aqparattyq-bibliografiıalyq bóliminiń janynan qurylǵan “Altyn Arqa” aqparattyq-aǵartýshylyq ortalyǵynyń uıymdastyrýymen aqyn, kompozitor, Qazaq KSR-iniń eńbek sińirgen mádeniet qaıratkeri Musa Asaıynovqa arnalǵan eske alý keshi ótti. Kesh barysynda oqyrmandar men qonaqtarǵa “Aqiyq ánshi – aqtańger aqyn” atty elektrondy basylym tanystyrylyp, aqynnyń qyzy Fatima Musaqyzy men týǵan-týysqandaryna 10 danasy tabys etildi.
Keshke Iran sal Tasqarauly qatysyp, “Musanyń ánin” oryndady. Aqynnyń aıtýy boıynsha bul ánniń sózin Musa Asaıynov jazyp, shyrqap júrgen eken. Búgingi tańda Iran sal aǵamyz bul ánge tórt shýmaq qosyp jandandyrypty.
Aqynnyń qyzy Fatima Musaqyzy ákesi jaıly estelikterin aıtyp, kitaphana ujymyna alǵysyn jaýdyrdy. Sonymen qosa oqyrmandar men kitaphana qyzmetkerleri Musa Asaıynov jaıly týǵan suraqtaryna qulaq qandyrar jaýaptar aldy.
Ólketanýshy, Abaı Myrzahmetov atyndaǵy KÝ professory, ǵalym Musataı Ǵalymuly kesh barysynda Musa Asaıynov jaıly qazirgi tańda zerttelip jatqan málimetterimen bólisti. Oqý zalynyń qyzmetkerleri de qonaqtardy tamasha ánimen tań qaldyrdy.
“Ádebiet jáne óner mýzeıiniń” bas qor saqtaýshysy Sara Kúzaıypovna Fatima Musaqyzyna mýzeıdiń qoryna tapsyrylǵan aqparattar men jádigerler úshin alǵysyn aıtyp, mýzeı atynan gúl shoqtaryn usyndy. Keshke J.Mýsin atyndaǵy joǵary qazaq pedagogikalyq kolledjiniń stýdenti Gúljanat Nádirhan da qatysyp, aqynnyń “Móldir kózder”, “Seni oılap júrek solady” óleńderin oqydy.
Sonymen qatar oqyrmandar nazaryna aqynnyń ómirbaıany men shyǵarmashylyǵynan syr shertetin kitaphananyń kitap qorynan daıyndalǵan kitap kórmesi usynyldy.